نکاح کا ریکارڈ · فیملی ری یونین ویزا

آپ نے جرمنی یا کسی اور یورپی ملک کے فیملی ری یونین ویزا کے لیے درخواست دی، اور سفارت خانے سے correction کی ای میل آ گئی۔ کہیں نام کے ہجے مختلف ہیں، کہیں تاریخِ پیدائش غلط ہے، کوئی دستخط موجود نہیں یا کوئی خانہ خالی رہ گیا ہے۔ اب سفارت خانہ عدالت کا حکم مانگ رہا ہے۔ یہ مضمون بتاتا ہے کہ ایسا کیوں ہوتا ہے، کون سی ڈگری درکار ہوتی ہے، اور آپ یا آپ کے شریکِ حیات بیرونِ ملک رہتے ہوئے پاکستان میں یہ مقدمہ کیسے چلا سکتے ہیں۔

نظرثانی: ارشد محمود ورک، ایڈووکیٹ ہائی کورٹ، لاہور · آخری نظرثانی: نومبر 2026

چھوٹی غلطی بڑا مسئلہ کیوں بنتی ہے

پاکستان میں مسلمانوں کا نکاح، نکاح نامے میں درج ہوتا ہے اور مسلم فیملی لاز آرڈیننس 1961 کی دفعہ 5 کے تحت یونین کونسل میں رجسٹر ہوتا ہے۔ نادرا کا میرج رجسٹریشن سرٹیفکیٹ (MRC) اسی ریکارڈ سے جاری ہوتا ہے۔ سفارت خانہ ان سب دستاویزات کو آپس میں اور دونوں میاں بیوی کے پاسپورٹ اور شناختی کارڈ سے ملاتا ہے۔

اگر یہ آپس میں نہ ملیں تو سفارت خانہ یہ طے نہیں کر سکتا کہ یہ لاپرواہی کی غلطی ہے یا دستاویز میں ردوبدل کیا گیا ہے۔ اس لیے وہ ایسی چیز مانگتا ہے جو سوال ختم کر دے: پاکستانی عدالت کی ڈگری۔

عام طور پر سامنے آنے والی غلطیاں

  • دولہا، دلہن یا والد کے نام کے ہجے پاسپورٹ یا شناختی کارڈ سے مختلف
  • غلط تاریخِ پیدائش، جو کبھی کبھی ترجمہ کرنے والے کی غلطی سے آ جاتی ہے
  • ازدواجی حیثیت کا خانہ خالی، مثلاً جب دولہا یا دلہن پہلے طلاق یافتہ تھے
  • نکاح خواں، گواہوں یا وکیل کے دستخط موجود نہیں
  • رجسٹریشن کے خانے خالی، یا رجسٹریشن کی تاریخ MRC سے مختلف
  • ایک ہی نکاح نامے کی مختلف نقول میں مختلف اندراجات

ہاتھ سے درستی نہ کریں اور نیا نکاح نامہ نہ بنوائیں۔ کسی اندراج کو کاٹ کر لکھنا، برسوں بعد بغیر حکم کے دستخط کروانا، یا مختلف حقائق کے ساتھ نیا نکاح نامہ بنوانا ایک سادہ غلطی کو جعل سازی کے شبہ میں بدل سکتا ہے۔ سفارت خانے یونین کونسل اور وکلاء کے ذریعے دستاویزات کی تصدیق کرواتے ہیں۔ محفوظ راستہ وہی ہے جو عدالت کے ذریعے، ریکارڈ پر ہو۔

عدالت سے کیا مانگا جاتا ہے

عام طریقہ یہ ہے کہ اسپیسیفک ریلیف ایکٹ 1877 کی دفعہ 42 کے تحت استقرارِ حق (declaration) کا دیوانی دعویٰ دائر کیا جائے، کہ نکاح فلاں تاریخ کو فلاں افراد کے درمیان ہوا اور غلط اندراج محض تحریری غلطی ہے۔ اگر ریکارڈ خود بدلنا ہو تو اسی ایکٹ کی دفعہ 55 کے تحت حکمِ امتناعیِ لازمی بھی مانگا جا سکتا ہے، جس میں یونین کونسل اور نادرا کو اندراج درست کرنے کی ہدایت ہو۔

کون سی عدالت مجاز ہے، اور معاملہ دیوانی عدالت کا ہے یا کسی انتظامی افسر کا، اس کا انحصار غلطی کی نوعیت اور ضلع پر ہے۔ عدالتیں ہمیشہ ایک رائے نہیں رکھتیں۔ ہم سب سے پہلے یہی دیکھتے ہیں، کیونکہ غلط فورم میں دائر مقدمہ مہینے ضائع کر دیتا ہے۔

طریقۂ کار

  1. دستاویزات کا جائزہ۔ نکاح نامہ (جتنی نقول آپ کے پاس ہیں)، MRC، دونوں کے شناختی کارڈ اور پاسپورٹ، اور سفارت خانے کی ای میل بھیجیں۔
  2. مشورہ اور فیس۔ کام شروع ہونے سے پہلے آپ کو معلوم ہوگا کہ کون سی کارروائی درکار ہے اور اس کی فیس کیا ہے۔
  3. مختار نامہ۔ بیرونِ ملک مقیم شریکِ حیات وہیں مختار نامہ دستخط کر کے پاکستانی سفارت خانے یا قونصل خانے سے تصدیق کرواتے ہیں۔ پاکستان میں موجود شریکِ حیات براہِ راست دستخط کر سکتے ہیں۔
  4. مقدمہ دائر اور پیروی۔ نکاح کے گواہ، عموماً نکاح خواں اور نکاح کے گواہان، عدالت میں درکار ہو سکتے ہیں۔ ان کی تاریخیں ہم طے کرتے ہیں۔
  5. ڈگری اور درست ریکارڈ۔ ڈگری کے بعد ہم مصدقہ نقول حاصل کرتے ہیں اور جہاں ڈگری ہدایت دے، یونین کونسل اور نادرا کا ریکارڈ درست کرواتے ہیں۔

سفارت خانے کو کیا بھیجنا ہے

سفارت خانے عموماً ڈگری، اس کا مصدقہ انگریزی ترجمہ، اور درست شدہ نکاح نامہ یا MRC مانگتے ہیں۔ مزید تصدیق کی ضرورت سفارت خانے کی موجودہ چیک لسٹ پر منحصر ہے، جو وقتاً فوقتاً بدلتی ہے۔ ہم کاغذات کا سیٹ آپ کو موصول ہونے والی درخواست کے مطابق تیار کرتے ہیں۔

اگر اپوائنٹمنٹ قریب ہے

عدالتی مقدمے میں وقت لگتا ہے، اور کوئی وکیل ڈگری کی تاریخ کی ضمانت نہیں دے سکتا۔ اگر مقدمہ زیرِ سماعت ہے تو آپ سفارت خانے کو مقدمہ دائر ہونے کا ثبوت اور اگلی تاریخ بھیج سکتے ہیں۔ ہم مقدمے کی موجودہ صورتحال پر ایک خط دے سکتے ہیں۔

انگریزی میں پڑھیں: Nikah nama correction by court decree

مزید: فیملی ری یونین ویزا کے کاغذات

یہ مضمون پاکستانی قانون کے بارے میں عمومی معلومات دیتا ہے۔ یہ کسی خاص مقدمے کے لیے قانونی مشورہ نہیں، اور کسی سفارت خانے کے قواعد بیان نہیں کرتا، جن کی تصدیق صرف وہی سفارت خانہ کر سکتا ہے۔

WhatsApp